La letra de la direktrisa de la Autoridad del Ladino para el anyo 5780

​

Shalom a todos los amantes del ladino en Israel i en el  mundo. Un proverbo en ladino dize :

"Kuando muncho eskurese, empesa a amaneser."

Penso ke después de estos mezes difisiles ke pasimos, estando la mayoría d´entre  mozotros enserrados

en muestras kazas, la luz ya esta empesando a apareser, i poko a poko, estamos tornando a la ancha aktividad

de la Autoridad. Vos kería aktualizar sovre lo ke esta pasando agora, lo ke uvo del empesijo del anyo i lo ke

esta por pasar a la kontinuasion de este anyo.

 

Ke es lo ke esta pasando agora?

Por la ora, estamos ovrando de kaza, atraves del zoom.

1. Lision en ladino -  estash bien invitados a partisipar en la lision de ladino, moderada por el Dr. Eliezer Papo, todos los días de Alhad, a las 17.00hs  (sigun la ora de Israel). Esta es una buena oportunidad de exersar el ladino i de ambezarse de la mas importante ovra ke fue eskrita en ladino, el "Meam loez".

 

Entrá al link :

HTTPS://ZOOM.US/J/4408900028

​

 

1. Konferensias – en kolaborasion kon el Instituto Yad Ben Zvi, transmitimos 3 konferensias en las datas siguientes : 19.6.20, 26.6.20 i 30.6.20 a las 11.00hs de la demianana (sigun la ora de Israel). El link es: https://campaign.wmgd.co.il/ybz-couch

El Doktor Eliezer Papo avlara de las romansas sabetaistas, komo ésta de Meliselda.

La Profesora Ora Schwarzwald (Rodrigue) avlara de palavras en ladino ke entraron al ebreo, komo : "burrekas", "spondja" i "hanukiya", i el Doktor Aviad Moreno mos kontara sovre la imigrasion del Maroko espanyol.

Todas las konferensias serán enrejistradas i prezentadas en el sitio i en el Facebook de la Autoridad, i podresh verlas en la inregistrasion kuando vos plaze. Eyas son dadas en ebreo.

 

   2. Una seria de enkontros (a través del zoom), en kolaborasion kon el sirkulo de ladino en Yerushalaim. Kada enkontro es dedikado a un diferente tema komo : "Yerushalaim", "komidas" o "umor". Los partisipantes i de Israel i de la Diaspora, kantan, kontan i prezentan tekstos de lektura relevantes al tema. La moderadora es la Doktora Iliel Baum.

 

Estos enkontros se están pasando solo en ladino. Por la ora, fiksimos entrunos 2 enkontros al 2 de yulio 2020 i al 6 de agosto 2020, a las 18.00hs, ora de Israel. Tambien estos enkontros serán enregistrados i prezentados en el sitio i el facebook de la Autoridad.

 

Ke tuvimos del empesijo del anyo antes ke ezbrocho la korona?

Vos keria apuntar unos kuantos sinyales de kamino:

1. La reunión de los Shadarim i el dia del Ladino – los Shadarim (embiados de la Autoridad) están ovrando en todo el mundo, kada uno en su komunidad, i están adelantando el ladino en koordinasion kon la Autoridad. Organizimos una sigunda reunión, ke komo su anterior despertó un gran entuziazmo. El kontakto kon la Diaspora es para mosotros muy importante. Este anyo adjuntimos la reunión al "Dia internasional del Ladino" i prezentimos un espektakulo artistiko kon Kobi Zarko i Gila Hasid. Esperamos ke la sigiente reunión tendrá lugar en Estambul.

2. Koleksion de kuentos de Makeda para las kriaturas – en kontinuasion a muestra aspirasion de trayer la kultura del ladino a la djoven generasion, publikimos este anyo, una koleksion de kuentos umoristikos sobre Makeda – la sivdad de los bovos, de los djudios sefaradim, ke registri, redakti i aranji para las kriaturas. La versión en ladino fue preparada por el Dr. Eliezer Papo, ansi ke podemos, no solo disfrutar de estos kuentos, sino ke también, amijurar el saver del ladino. El livro esta akompanyado de ilustrasiones echas por Eran Alekander. Podesh merkarlo en el buro de la Autoridad. El livro es bilingual: ladino en letras latinas i en ebreo.

 

1. El festival de ladino en Zafed – en kolaborasion kon la munisipalidad de Zafed, tuvo lugar este enverano, por la primera vez, un festival de ladino de 4 dias  kon espektakulos i kon konferensias. Mozotros prezentimos ayi el espektakulo de kantes "Yeladino número 2", kantes israelis de chikes trazladados al ladino  por el Prof. Shmuel Refael,  i también, la piesa teatrala : "En el kurtijo de la nona" ke es bazado sovre kuentos de la koleksion de los kuentos de Makeda. Yegaron miles de djentes i ansi, revelimos la kultura del ladino al ancho puevlo israeli. Esperamos ke esta será la aviertura de una tradision anual.

 

Mas ke avra a kontinuasion de este anyo?

1. El premio de la ovra en ladino -  deklarimos 2 premios de ovra: el uno de 30.000 shekalim para una ovra eskrita entera en ladino (kuento, piesa teatral, kostra) i la otra de 15.000 shekalim para una ovra eskrita en ebreo ke integrara palavras i frazas en ladino. Publikimos un avizo de deklarasion en el jurnal "Haarets" i nominimos un komite djurado. Los premios son dedikados para enkorajar una ovra kontemporal en ladino. Estamos planifikando los proksimos mezes, una seremomia

 

1. Un premio al exelente djoven investigador – deklarimos un premio de 15.000 shekalim al exelente djoven investigador. Publikimos una deklarasion en el jurnal "Haarets".

 

 

1. La Akademia del Ladino -  tendrá lugar una seremonia de lansamiento de la Akademia del Ladino, ke fue konfirmada por el governo de Israel. La Akademia esta ovrando basho el patronaje de la Autoridad. La Profesora Ora Schwarzwald (Rodrigue) fue eskojida a ser la prezidente de la Akademia i el Profesor Shmuel Refael será su sekretario akademiko.

 

1. Los shefes de los sirkulos del ladino-  vamos azer un enkontro de los shefes de los sirkulos del ladino para unirmos, para trokar ideas i para propozisiones de amijuramiento.

 

 

1. El Dia internasional del Ladino -  siguro ke estamos planifikando también el Dia internasional del Ladino. El komite exekutivo fikso ke este dia tendrá lugar a kada anyo en el dia de la fundasion de la Autoridad del Ladino, ke es el 17 de marso.

Vos sueto  salud i paz i todo bueno,

 

 

Prof. Tamar Alxander